كلام مهم جدا وخطير جدا بخصوص الثوره عشان نفهم (الثوره تحتضر) …. اقراه وانشره من فضلك


بسم الله الرحمن الرحيم

اخوتى الكرام اتمنى تقروا الكلام للأخر وفكروا فيه كويس اوى اوى لإن والله الموضوع فعلا خطير جدا جدا

ناس كتير بدأت تقول كفايه مظاهرات وكفايه اعتصام الثوره نجحت والدنيا زى الفل والتحرير موجود وكلام كتير من هذا القبيل مع احترامى للجميع بس انا عاوزكم تقروا كلامى وبعدها فكروا فيه وبعدا كل واحد يقرر هو حيعمل ايه

خلونى اعرض عرض سريع كده ليه الثوره قامت

الثوره يا جماعه لما قامت فهى قامت عشان تقضى على نظام فاسد

النظام ده مكون من خمس اضلاع اساسيه وهى كالتالى

الضلع الاول هو (حسنى مبارك ومجموعة الفاسدين)

الضلع التانى هو (الحزب الوطنى وشلة الفساد والمنتفعين من وراه من رجال الاعمال)

الضلع التالت  هو (امن الدوله)

الضلع الرابع هو (الجزء الفاسد من وزارة الداخليه )

الضلع الخامس هو (الإعلام الفاسد)

قامت الثوره العظيمه عشان تنهى على النظام الفاسد كله وبعد 18 يوم قضت على الضلع الاول بس اللى مع مرور الوقت كل يوم بنكتشف حاجه جديده عنه وعن انه لسه موجود ولسه رئيس للحزب الوطنى ولسه قاعد فى شرم الشيخ ولسه بتوصله تقارير وكلام من هذا القبيل اللى كلنا بنسمعه بغض النظر بقى هو صح ولا غلط لكن اللى اتعملناه فى عصر هذا النظام اللعين ان كل حاجه ممكن تحصل حتى لو مستحيله

المهم احنا قضينا على الضلع الاول وفرحنا جدا وقلنا خلاص الدنيا حتبىق زى الفل ونهدى بقى وبدأ كل واحد يحلم بمصر ولمصر وبدأنا ننضف ونصلح وكلنا امل نشوف مصر احسن بلد فى الدنيا وفى وسط الاحداث دى نسينا ان فيه اربع اضلاع لسه موجوده وبتلعب بقوه … اى نعم هى كانت خامله وقت الثوره وبعد الثوره لكن اما الدنيا بدأت تهدى هى بدأت تنشط وبقوه

خلونا نستعرضهم مع بعض وواحده واحده

 

الضلع التانى اللى هو الحزب الوطنى

مجموعه منه اتجهت لعمل حزب جديد باسم 25 يناير عشان يلحقوا حاجه من الهوجه ويبقوا فى الصوره وباقى الحزب بدأ يجمع نفسه طول الفتره اللى فاتت عشان فى الاخر يخرج محمد رجب امين عام الحزب ويعلن ان الحزب حينزل الانتخابات البرلمانيه اللى جايه وما ادراكم بقى ممكن يحصل ايه تانى لو نزل هذا الحزب ببلطجيته وبفساده وبكل الضغينه اللى حصلت جواه بسبب الثوره ساعتها توقعوا انهار من الدماء المصريه

 

الضلع التالت اللى هو امن الدوله

بعد حرق مقراته فى كل محافظات مصر بقى ليه جزء فى مديريات الامن بيمارس منه نشاطه بكل قوه وبالفعل حاجات كتير بدأت تظهر منهم زى منع د / القرضاوى من الظهور على تلفزيون مصر وزى منع حازم فاروق عضو الاخوان من السفر لبيروت عشان يحضر مؤتمر عن الثوره وزى التضييق اللى بدأو يرجعوا يعملوه على ناس كتيره جدا انا اعلمهم واعرفهم معرفة شخصيه وزى الاعتقالات والمعتقلين اللى مازل بيمارس ضدهم حتى هذه اللحظه ابشع انواع العذاب  وزى الفتن اللى عمالين يعملوها فى الصعيد من زبح لقسيس ومن حرق لبيت بهائى

يبقى ده معناه ان امن الدوله افسد جهاز فى مصر كلها رجع تانى بقوه شديده وما ادراكم بقى لو رجع زى الاول والله لتعيش مصر اسوأ ايام حياتها لإن الرجوع حيبقى رجوع انتقام

 

الضلع الرابع اللى هو وزارة الداخليه

بعد كل اللى حصل من افراد فاسده منهم وبعد الهلع والفزع اللى عاشت فيه مصر بسبب فساد بعضهم وانسحابهم وبعد كم الشهداء اللى وقعوا فى المظاهرات وبعد كل البلاوى اللى بتتكشف كل يوم

ومع ذلك كنا كلنا بنادى باعادة بناء الثقه بين الشعب وبين الشرطه عشان يجى فى يوم واحد

ظابط شرطه فاسد لا يعرف معنى المسئوليه يضرب سواق بالنار ويعمل قلق فظيع فى المعادى بعد الدنيا ما كانت هاديه

ويجى شخص غير محرم مش عاوز اقول انسان زى مدير امن البحيره يخرج يقول للعساكر بتوعه انتم الاسياد واللى ما يسمعش كلام سيده ينضرب بالجزمه (شكرا جدا يا محترم ) احنا بإذن الله قادرين نعرفك مين هو السيد ومين هو العبد

ويخرج وزير الداخليه المبجل اللى هو جزء من نظام قديم فاسد عشان يقولك ان الشهداء اللى ماتوا دول بسبب قله مندسه بين المتظاهرين واكن كل الشعب  اللى شاف الرصاص والقنابل واللى انضرب بيها المفروض يبقى غبى ويقول اه فعلا

اومال لو ما كناش انضربنا بيه كنت حتقول ايه

ادى الداخليه يا جماعه العضو الرابع فى منظومة الفساد

 

الضلع الخامس والاخير وهو الاعلام

الاعلام ده بقى ليه قصه كبيره وبيلعب لعبه قذره جدا

الاعلام عباره عن جزئين تلفزيون وصحافة

التفلزيون اول ما لقى الريس خلاص بخ باعه فى لحظه وبدأ يرجع على طول فى صف الشعب اللى فضل يكدب عليه 18 يوم بحالهم ده غير كدبه عليه لمدة 30 سنه

المهم بدأ تلفزيون الحكومه يلمع الثوره ويجيب شباب الثوره ويجيب ناس ما كناش نحلم انهم يظهروا عليه طبعا كلنا بدأنا نحلم باكتر واكتر ونقول خلاص مصر رجعت لكن فى نفس اللحظه بدأ نفس التلفزيون يعمل حاجه غريبه

يحاول يلمع فى الشرطه وظباط الشرطه

يجيب محمود وجدى وزير الداخليه فى خطاب مستفز للشعب كله

يمنع ناس من الظهور على شاشته

واخيرا النهارده نسى خالص يقول ان كان فيه ناس فى التحرير بيتظاهر وقال ايه كان بيسلى الشعب بكارتون توم وجيرى

على فكره هو نفس التلفزيون اللى الجمعه اللى فاتت كان فى التحرير وكأن التلفزيون ده بيدار بريموت كنترول  اعمل يعمل وما تعملش يبقى خلاص ما يعملش

الصحافه دى بقى قصه تانيه خالص

فاكرين يا جماعه ممتاز القط واسامه سرايا وابو حديد دول بتوع الصحف القوميه كانوا بيقولوا على الثوره ايه طول 18 يوم (عملاء وخونه وقله وحراميه وفاسدين ومخربين وووو) وفجأه وبقدرة قادر بقينا رجال وشباب الثوره اللى رجع لمصر مجدها

يا شعب مصر ده احنا اتعلمنا ان اللى يشتم غيرك قدامك بكره حيجى يشتمك من ورا ضهرك قدام صاحبك

مابالكم بقى باللى شتمك فى وشك وفجأه ضحك فى وشك

الصحافه برضو بتلعب لعبه قذره مفادها عناوين رنانه وكلمات مثيره وخلى الشعب يحس اننا معاهم بقى واننا ضد الفساد والله يا جدعان ديل الكلب عمره ما حيتعدل

الشعب طبعا يقرا الكلام ده فيهبط اوى يقولك نجحت الثوره وفى نفس اللحظه اضلاع الفساد واضلاع النظام الفاسد شغاله على اشدها فى اجهاض الثوره ومحاولة القيام من جديد

 

طولت انا اسف بس الكلام ده مهم جدا جدا الكل يبقى فاهمه اختم معلش بكام نقطه مهمين

1–شفيق لازم يمشى فورا وحالا بغض النظر بقى انه كده كده ماشى والكلام اللى الكل بيرددو ده

من الاخر يا جماعه شفيق ده اكتر بيئه خصبه واكتر تربه مناسبه عشان اضلاع الفساد يرجعوا تانى كما كانوا وبالتالى ال6 شهور دول هما مسألة حياة او موت بالنسبه ليهم لازم يستغلوا وجوده وبقوه عشان يحميهم هو لحد ما كل اركان الفساد واضلاعه يكتمل قيامها

وبعدها بقى ما تستبعدش خالص انه يفضل مستمر فى الوزاره او حتى يبقى رئيس ما خلاص بقى

وطبعا فى سبيل ان ده يحصل هما بيعلمونا وبيخلونا نردد كلمات وجمل رائعه منها

هو كده كده ماشى خلوه يخلص مدته ويروح لحال سبيله

نديله فرصه ونشوفه ده راجل محترم وابن ناس وبيكلم باحترام واكن المفترض ان اللى يكلمنا يبقى بيتكلم بقلة ادب عشان اقوله امشى يا جماعه الاصل هو الاحترام مش قلة الادب بس عشان احنا غلابه الدنيا بقت معكوسه معانا

 

2- نقطه تانيه مهمه جدا جدا

كل الناس بدات تقولك يلا نبى بلدنا ويلا ننضف بلدنا ويلا نعمل ويلا نخلى وكفايه مظاهرات وكفايه اعتصامات واهو التحرير موجود

يا جماعه حاقولكم حاجه بسيطه انت لو عندك عماره 10 ادوار عاوز تبنيها فانت لازم تعملها اساس متين جدا عشان تستحمل ال10 ادوار

الاساس فى حالتنا هنا هو الثوره والمطالب بتاعتها اللى لسه ما خلصتش ولا اتحققت

النضافه بقى والبناء والتعمير وخلافه فدى هى العماره الكبيره اللى لو فضلنا نبنى فيها ونكبر العماره ونسينا الاساس والله حيجى يوم وتقع فوق راسنا كلنا ومش حيقوم لها قومه

ركزوا بالله عليكم على الاساس كويس اوى اولا ومفيش مانع اننا نفكر فى ال10 ادوار وفى العماره الجميله بس ما ننساش ان لسه الثوره ما خلصتش

 

3- لو عندك كرتونه تفاح وفيها 5 تفاحات بايظين وانت قمت جاى شايل منهم اربعه وسايب واحده بس فانت لازم تكون متأكد انها حتبوظ الكرتونه كلها

ما بالك بقى اما تبقى انت شايل تفاحه واحده بايظه وسايب الباقى كله في الكرتونه

يا جماعه احنا من النظام الفاسد كله شلنا مبارك لكن كل الفساد الباقى لسه موجود وبيرتع فى كل مكان وبحريه

 

اختم واقول بالله عليكم اوعو تخلوا التاريخ يوصمنا بالعار ويقول ده الجيل اللى عمل نص ثوره وفضل يحتفل بيها لحد ما ضيعها وضيع مصر معاها

خلو التاريخ يذكرنا بالخير لإن التاريخ مش بيرحم

تحيا مصر

 

من فضلك انشر النوت عشان غيرك يقراها

جزاكم الله خيرا

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s